Эдийн засгийн хямралтай энэ цаг үед хэмнэлтийн горимд шилжиж, зарлагаа хасч танаж байж амь тавихаас наагуур байгаа эдийн засгаа сэргээж, төсвийн тодотгол хийхийн тулд иргэд нь бүсээ чангалах ёстой гэж Засгийн газар болон эрх баригчид яриад байгаа. Нэг хэсэг цалин тэтгэвэр хасна танана, төрийн алба хаагчдыг цомхтголд оруулна, татвар нэмнэ зэргээ харц ардуудыгаа айлган сүрдүүлсэн ч харин азаар тийм шийдвэрүүд гаргасангүйд олон түмэн баярлаж байна.
Эдийн засгийг сэргээж хөл дээр нь босгохын тулд иргэд бүр бүсээ чангалж, идэх хоолоо багасгаж тансаг хэрэглээгээ хязгаарлах хэрэгтэй гэсэн ойлголт мессэжийг ард иргэдэд өгөөд байгаа нь үнэн. Хамгийн гол нь эдийн засгаа сэргээхийн тулд хэн илүү хэмнэлт хийх ёстой вэ.
Аж амьдралаа залгуулах гэж ядарч зүдэрч яваа жирийн иргэдээс уу, аль эсвэл төсвийн мөнгийг үрэн таран хийж, үргүй буюу өөртөө зарцуулж байгаа тансаг хэрэглээтэй эрх баригчид болон сайд дарга нараас уу гэдгийг ялгаж салгамаар санагдах юм. Юм л болвол ядарсан ард иргэдийнхээ халаасыг тэмтэрч хамаг юмыг нь хааж боох гээд байгаа мэт сэтгэгдэлийг нийгэмд төрүүлээд байгааг нуухгүй. Жирийн иргэд нь энэ Мэргэжлийн Засгийн газрын гаргасан шийдвэрүүдэд бухимдаж эсэргүүцлээ илэрхийлсээр байна. Үнэхээр хэмнэлт хийх гэж байгаа бол хамгийн түрүүнд дансандаа хэдэн зуун тэрбумын хадгаламжтай баячуудаас эхлээч. Байр савтай, банкиндаа мөнгөтэй олон хүн байна. Амьдрах гэж ар гэрээ тэжээх гэж яваа ард иргэдээрээ битгий оролдооч.
Мэргэжлийн Засгийн газар хадгаламжийн хүүгээс татвар авдаг болно гэдгийг харин дэмжсэн иргэд цөөнгүй бий. Яагаад гэвэл өнөөдрийн байдлаар дансандаа хэдэн тэрбумын хадгаламжтай баячууд олон байна.
Тухайлбал, Монголд дансандаа 30-100 тэрбум төгрөгийн хадгаламжтай 200-300 хүн байна. Эдгээр хүмүүс 26 жил татвараас нуугдаж ирсэн нь үнэн. Ийм хэмжээний хадгаламж хэнд байгааг судлаад үзэхээр УИХ-ын гишүүд болон сайд нар байна. Өөрсдөдөө зориулж татварын тухай хууль бичиж батлуулаад 26 жил татвараас чөлөөлөгдөж ирсэн эдгээр нөхдүүдээс эхлээд татвар авдаг болооч ээ гэж хэлмээр байна.
No comments:
Post a Comment